PolíticaÚltima hora

Ana Pontón expón no Barco a importancia de contar cunha tarifa eléctrica galega

A portavoz nacional do BNG mantiña un encontro cos veciños da vila no Malecón na tarde do 15 de xuño
A portavoz nacional do BNG durante a súa intervención no Barco./ Foto: Carlos G. Hervella.

En Galicia, e máis en concreto na provincia de Ourense, “somos grandes produtores de electricidade, a electricidade é o noso petróleo, ¿pero que beneficios obtemos nós del?”, apuntaba a portavoz nacional do BNG, Ana Ponón, no marco do encontro “Alternativas do Nacionalismo para o futuro” que mantiña cos veciños do Barco na tarde do 15 de xuño.

 

Público asistente a este encontro do BNG, celebrado no Malecón./ Foto: Carlos G. Hervella.

 

Entre os diferentes temas que abordaba estaba o da necesidade dunha tarifa eléctrica galega, “algo que o BNG leva moito tempo defendendo” e que agora considera algo fundamental tendo en conta que “xa non é que non vaiamos a ter beneficios, é que por riba imos ter perxuízos porque se está preparando un decreto que lle vai subir a luz a todos os galegos porque aquí a lei faise a medida das grandes eléctricas e se hai impostos medioambientais en vez de pagalos quen leva o beneficio os teñen que pagar os usuarios”.

Tamén explicaba que o feito de poder contar con beneficios como produtores de enerxía permitiría que Galicia “puidese atraer empresas” ao ter menos custes enerxéticos. “Sería unha revolución, significaría empezar a tomar o control dos nosos recursos para que isto repercuta na sociedade”.

 

 

Ana Pontón concluía con este acto a visita que realizaba o 15 de xuño a Valdeorras./ Foto: Carlos G. Hervella.

Outra das cuestións nas que incidía era a do debate que se está a producir no ámbito estatal, pero que non trascende, sobre “o futuro do sistema de financiamento” en relación coas competencias que xestiona a Xunta de Galicia. Pontón dicía que o sistema de financiamento actual “é moi opaco e o Estado nunca nos acaba de dicir a capacidade fiscal que ten o noso país”. E avogaba por un “sistema de concerto económico, ganaríamos máis en recursos e apostaríamos por evitar que a riqueza siga fuxindo. É un sistema que xa funciona noutras partes do Estado español”.

 

Manuel Agra, coordinador do BNG en Valdeorras, no peche do acto./ Foto: Carlos G. Hervella.

 

Este acto, no que interviña na apertura Suso Vilasánchez, do BNG de Valdeorras, concluía coa intervención do coordinador comarcal desta formación política, Manuel Agra, quen agradecía a visita de Ana Pontón ao longo da xornada do 15 de xuño a esta zona ourensá, acompañada pola deputada ourensá Noa Presas. E pedía o apoio para o “BNG e para unha persoa que está levantando moita ilusión, como é Ana. É hora de que en Valdeorras se note de verdade o efecto Ana Pontón”.

Artigos relacionados

Back to top button