No mediodía deste sábado 12 de agosto producíase un incendio nun garaxe ao carón dunha nave de autocares en Castro Cadelas, no que “non houbo que lamentar danos persoais e tan só ardeu un turismo, practicamente na súa totalidade, sen causar tampouco máis danos materiais”, aseguran dende o 112 Galicia.
Os feitos tiñan lugar ao redor das dúas da tarde. “Foi a esa hora cando unha persoa particular informaba dun incendio nunha nave de coches situada na Avenida de Ourense, en Castro Caldelas”, explican dende o 112, engadindo que ata o lugar, acudiron de inmediato os membros do GES e os efectivos de Protección Civil de Castro Caldelas e a Garda Civil.
Os xestores de emerxencias tamén puxeron os feitos en coñecemento dos Bombeiros de Valdeorras, de Ourense e do GES de Maceda, “por se nalgún momento fose precisa a súa intervención”, din dende o servizo de emerxencias que tamén informaba ao persoal de Medio Ambiente da Xunta “que desprazou ao punto un vehículo para subministrar auga e dar apoio aos profesionais de extinción que traballaban no lugar”.
Unha vez no punto, e tras controlar o lume, “os membros do GES da localidade indicaron que o que ardía era un coche nun garaxe particular, moi preto dunha nave de autocares, que non se viu afectada”, explican dende o 112 asegurando que “sobre as 17 horas o GES de Castro Caldelas daba por rematada a súa intervención”.