A Confitería Cerviño, unha empresa familiar que basea a elaboración dos seus produtos de repostería na tradición e no traballo artesán con sede no Carballiño, recibía neste luns 17 de xuño de mans da directora xeral de Comercio, Sol Vázquez, e do xerente de Galicia Calidade, Alfonso Cabaleiro, o distintivo de garantía de Galicia Calidade, nun acto que tamén contaba coa presenza do alcalde do municipio, Francisco Fumega.
Isto implica que a partir de agora a Confitería Cerviño contará co selo de garantía para as súas “cañas fritas” comercializadas coa marca Cerviño, recheas de crema ou nata. As cañas do Carballiño, recoñecidas a nivel internacional, elabóranse dende hai máis de 50 anos neste establecemento familiar, que durante catro xeracións liga o seu apelido á calidade e á tradición artesán e resposteira.
A directora xeral de Comercio agradeceu a aposta da Confitería Cerviño por promocionar un produto tan ligado á tradición reposteira de Galicia e do Carballiño. Con este recoñecemento, as cañas Cerviño poderán chegar a novos mercados, coa garantía que lles ofrece o selo de Galicia Calidade e distinguirse pola súa orixe e calidade superior.
O xerente de Galicia Calidade, Alfonso Cabaleiro, sinalou, pola súa banda, a relevancia do sector alimentario dentro do selo e mostrou a súa satisfacción pola incorporación dun produto tan representativo da repostería galega como as cañas fritas do Carballiño. Deste xeito, destacou que “sumamos un novo produto tan coñecido e representativo de Galicia e do Carballiño a unha lista moi completa na que integramos produtos galegos de calidade coma ovos, viño, polo, auga ou a pescada, entre outros”.
Con esta incorporación, o selo de certificación Galicia Calidade suma máis de 400 produtos e servizos de máis de 110 empresas galegas.