No mes de xullo deste ano o Centro de Deportes Barco cumpría 50 anos. Medio século de historia no que o equipo de fútbol sufríu numerosos altibaixos tanto deportivos como persoais, con máis de dez directivas e xestoras, miles de euros de presuposto e innumerables e irrepetibles historias vividas polas xentes do Barco, que estiveron e aínda permanecen, vinculadas a este club. Momentos difíciles, problemas económicos, perdas persoais, enfrontamentos, incertidume… pero tamén momentos gloriosos, anécdotas, amizades eternas,…
O 50º aniversario do club de fútbol de referencia na comarca de Valdeorras era sen dúbida unha destacable data para xuntar a algúns dos centos de xogadores que por el pasaron neste tempo. E así o facían na xornada do 23 de setembro, nunha exitosa xuntanza que reunía a máis de 140 persoas vinculadas ao CD Barco.
A esta significativa e emotiva celebración adicamos o tema de portada do número de outubro de O Sil Deportivo, á venda xunto co número mensual do Periódico O Sil, cun resumo visual do que foi a xornada de reencontros. Dende a súa fundación na tempada 73/74 ata a actualidade, unha representación, maior ou menor dependendo da tempada, de cada unha das etapas deportivas do club, asistía á xuntanza.
Neste número en papel publicamos imaxes dalgúns deses xogadores agrupados en planteis: parte do equipo xuvenil que ascendeu á Liga Galega (93/94); os que estiveron máis de oito anos no club; os fundadores; os do ascenso a 3ª (81/82); os porteiros; os de Éntoma,…
