A práctica do fútbol gaélico vai a máis. Proba diso é a convención da Gaelic Athletic Association, unha posta en común das competicións a nivel europeo celebrada esta fin de semana en Bélxica, que pon de manifesto o auxe deste deporte en todo o continente. A cidade de Ourense non queda atrás, cunha intensa actividade por parte do Auriense F.G. que conta con dous equipos na liga galega, e que desprazou a dous dos seus xogadores para participar na xuntanza.
A reunión tiña lugar nunha fin de semana na que o equipo masculino do Auriense lograba unha importante vitoria contra o Baithrechas da Estrada. Tal como explican dende o club ourensán a xornada do domingo 26 de novembro deparou un “partidazo no Campo da Universidade, onde estaba en xogo a clasificación para o grupo que loitará polo título galego na segunda volta” que se resolvía favorablemente para os locais, cun axustado 03-11 (20) 02-13 (19), tras unha final “practicamente de infarto”. Un resultado que confirma a boa tempada do conxunto ourensán, asentado entre os grandes do fútbol gaélico galego.
A vindeira fin de semana os equipos masculino e feminino do Auriense viaxarán ata A Coruña para enfrontarse a Fillos de Breogán, un dos candidatos ao título.
