Unha vez máis o Concello de Barbadás mostrou o seu rexeitamento á violencia de xénero. Na mañá deste venres 24 de novembro levouse a cabo, na entrada da Casa Consistorial, a lectura dun manifesto con motivo do 25-N. A concelleira de Igualdade, Elisabeth González, alzou a voz para denunciar a situación que están a vivir moitas mulleres. “É preciso que como sociedade tomemos medidas contundentes para combater esta problemática. Debemos educar e concienciar dende idades temperás sobre a igualdade de xénero, promovendo o respecto e a empatía entre homes e mulleres”, dixo.
Como mostra do seu compromiso para erradicar esta lacra social, o Concello estendeu a todo o mes de novembro a programación do 25-N. A loita comeza coa concienciación dos máis novos e por iso organizáronse obradoiros nos centros educativos baixo o lema “Semellantes e diferentes, con igual valor”. A iniciativa está dirixida ao alumnado de sexto de Primaria dos CEIP Filomena Dato, O Ruxidoiro e o Luis Vives e aos estudantes de primeiro curso da ESO do IES Ferro Couselo.
Esta tarde, ás 20:30 horas, comezará na Casa da Cultura o espectáculo teatral Insubmisa, de Antagonista Teatro. Ademais, a Casa da Mocidade será o escenario no que mañá, 25 de novembro, se ofreza un obradoiro de autodefensa para mulleres, de 11 a 13 horas.
