Podio valdeorrés na 1º Regata Eurorrexión Galicia-Norte de Portugal, que se disputaba neste domingo 10 de abril no encoro de Verducido (Pontevedra). O padexeiro barquense Adrián Prada Pérez (Club Piragüismo Verducido-Pontillón) competía en K-1 sénior nas tres distancias da cita: 200 m, 500 m e 1.000 m. Nas tres lograba clasificarse entre os 9 primeiros desta regata, cun notable nivel de calidade, o que lle daba o pase ás finais A, o grupo dos mellores.
Xa nas finais A o piragüista barquense quedaba oitavo nos 200 m, e rozaba o podio nos 1.000 m, no que ía terceiro, pero finalmente entraba de cuarto cun resultado moi axustado. A medalla quedaba en mans de Iago Monteagudo (Club Naval de Pontevedra) cun tempo de 00:03:53,29, mentres que Adrián Prada entraba cuarto cun rexistro de 00:03:59,86.
Pero na final de 500 m o valdeorrés non deixaba escapar a medalla. Lograba un tempo de 00:01:53,86 que lle valía o bronce e subirse a un podio xunto ao vencedor, Fernando Pimenta (Club Sport Lisboa e Benfica), e co subcampión, Antonio Palmas (Club Piragüismo Vilaboa).
Fotos e vídeo: Amanda Fernández.
