Despois de dous anos adaptando a maxia desta data ás circunstancias, con videochamadas e pantallas protectoras de por medio, na tarde deste xoves 5 de xaneiro regresaba por fin á Rúa a esperada Cabalgata dos Reis Magos, cun completo percorrido pola vila que remataba na praza do Concello.
Tralo xantar, en torno ás 15 horas as súas maxestades visitaban o Centro de Día e as residencias de maiores da Rúa (Fátima e Pinos), e xa ás 17 horas eran recibidos na praza da Estación onde subían á carroza (que este ano sorprendía aos cativos cunha máquina de pompas de xabón) repartindo caramelos durante o percorrido con paradas na praza de Vilela, na Igrexa de Santo Estevo e na Igrexa de Fontei, pasando tamén polo Barrio de Fátima.
De regreso, xa na praza do Concello, en torno ás sete da tarde tiña lugara a recepción final acompañados polo paxes reais e cargados de lambetadas.
Fotos e vídeos: Mónica G. Bellver.
