PolíticaÚltima hora

Candidatura unitaria de delegados dos socialistas ourensáns, encabezada por Fumega, para o congreso de Valencia

Contará con representantes municipais e parlamentarios así como con militantes de base, e nela integrarase tamén á ex deputada, Noela Blanco

O socialista Francisco Fumega, alcalde do Carballiño./ Foto: Carlos G. Hervella.

 

O PSdeG-PSOE de Ourense presentará unha candidatura unitaria de delegados para o próximo 40 Congreso Federal do PSOE que se celebrará en Valencia para respaldar o proxecto encabezado por Pedro Sánchez, así o aseguran nun comunicado emitido esta tarde os socialistas ourensáns.

Esta lista estará encabeza por Francisco Fumega, alcalde do Carballiño, e contará con representantes municipais e parlamentarios así coma con militantes de base, “e nela integrarase tamén á exdeputada, Noela Blanco, quen finalmente acepta a invitacion feita pola dirección do partido e polo propio Fumega”, segundo a nota de prensa.

A candidatura provincial representará “ao conxunto do partido na provincia ourensá en base ao chamamento á integración e unidade feito polo secretario xeral dos socialistas galegos, Gonzalo Caballero”.

Desde o PSdeG-PSOE na provincia de Ourense destacan que esta candidatura de integración representará a vontade de todo o partido na provincia, co fin primordial de fortalecer un proxecto unánime en torno ao presidente do Goberno, Pedro Sánchez, construído desde os distintos concellos da provincia.

No actual contexto, o PSdeG-PSOE de Ourense considera “imprescindible acadar a máxima unidade para arroupar ao secretario xeral do PSOE, impulsando así a importante e necesaria axenda de progreso que Sánchez está desenvolver desde o Goberno central e que tanto precisa a provincia. Un socialismo forte, unido e comprometido é a única alternativa para facer fronte á artificial confrontación e aos despropósitos sociais e económicos da dereita, a ultradereita e o caciquismo”, conclúen.

Artigos relacionados

Back to top button