Nesta mañá Cáritas Interparroquial do Barco recibía na súa sede unha doazón de 1.400 quilos de produtos de primeira necesidade aportados por Mercadona. Trátase, principalmente, de leite, azucre e cacao, produtos que, especialmente nos últimos meses, escasean no seu banco de alimentos.
Dende Cáritas agradecen esta doazón que chega nun momento complicado como o actual no que se ten incrementado a demanda do seu banco de alimentos debido á crise causada polo Covid-19 e no que teñen reforzado os seus servizos asistenciais. O número de familias que están atendendo, dende a declaración do estado de alarma ata a actualidade, ascende a 122 familias con distintos graos de vulnerabilidade e necesidades asistenciais.
Ao mesmo tempo, Cáritas agradece ao Concello do Barco e ao seu departamento de Servizos Sociais, a súa intermediación no desenvolvemento desta doazón.
Pola súa banda, Mariña Rivas, xerente de Relacións Externas de Mercadona en Galicia, destaca “o magnífico labor que desenvolven dende Cáritas para axudar ás persoas máis desfavorecidas. Son entidades que non deixaron de traballar para axudar aos demais nestes tempos difíciles”.
Con este tipo de xestos, Mercadona continúa reforzando o envío de doazóns a diferentes entidades da provincia como o Banco de Alimentos ou o Comedor Social de Cáritas en Ourense, ao que entrega a diario produtos de primeira necesidade que non son aptos para a venda, pero si para o seu consumo.
Foto cedida.
