Un total de 919 persoas foron atendidas ao longo do 2013 a través do Programa de Cáritas Interparroquial do Barco. Dese total a cifra de 655 corresponde a familias e os 264 restantes son transeúntes. Por idades chama a atención que o maior número de persoas atentidas teñen entre 1 e 25 anos (316), mentres que 295 persoas teñen máis de 45 anos. Así se recolle no boletín informativo do ano 2013 que está a distribuír esta entidade, que preside Julio Mourelo, para dar a coñecer os seus datos de actividade durante o pasado exercicio.
Asemade no 2013 prestáronse un total de 8.212 servizos a familias e 8.994 a transeúntes. De todos os servizos prestados o 55,39% foron a españois e o 44,61% foron a estranxeiros.
Cáritas Interparroquial do Barco pechaba o 2013 cun déficit de 2.822,73 euros.