A solidariedade, a moda, a beleza e tamén a música, daranse a man no segundo desfile que os empresarios vianeses Jorge Álvarez (estilista e modelo) e Patricia Ares (responsable de De Patri) están preparando para o mes de decembro.
Non é a primeira vez que o fan. De feito a segunda edición deste desfile chega despois do éxito de acollida que tivo a iniciativa o ano pasado, na que o público enchía a Casa da Cultura de Viana do Bolo. Ese será de novo o escenario no que se desenvolverá o espectáculo na tarde do 17 de decembro.
Polo escenario desfilarán unha vintena de modelos (profesionais e tamén veciños da vila) con peiteado e maquillaxe de Jorge Álvarez Estilistas, e prendas do comercio vianés De Patri e tamén dalgúns novos deseñadores que se suman á iniciativa. Entre eles, o vigués Manuel Pampillón, xove promesa da moda que presentará algunhas das súas creacións.
Tal como adiantan dende a organización, este ano o desfile contará con algunha actuación musical así como cun espectáculo infantil “a cargo dos nenos que asisten ás clases de zumba”, explica Jorge, destacando o carácter benéfico da gala. A entrada é de balde pero todo aquel que o desexe pode contribuír coa súa aportación: alimentos non perecedoiros, roupa ou xoguetes que serán entregados a Cáritas de Viana, que máis tarde se encargará do reparto entre os máis necesitados. “A única condición é que primeiro se atendan as necesidades da xente da zona”, puntualiza Jorge.
Ademais de seguir perfilando o programa deste segundo desfile e do seu traballo ao fronte do salón de beleza, o xove Jorge Álvarez regresa a un mundo da moda que sempre lle gustou, e faino da man do seu amigo, o deseñador Manuel Pampillón, como imaxe da súa marca.
