Na tarde o mércores 22 de decembro, o alcalde de Monforte, José Tomé Roca, homenaxeaba en nome de todos os monfortinos e monfortinas, a catro deportistas do Club Taekwondo Neka, polos excelentes resultados que acadaron no Campionato de Europa de Taekwondo que se celebrou en Seixal (Portugal) entre o 19 e o 21 do pasado mes de novembro, representando á Selección Española de Taekwondo.
No acto de recoñecemento, o alcalde estivo acompañado polos 4 homenaxeados, Alejandro Losada, Carlos Rey, Laura Álvarez e Daniel Areán, así como pola primeira tenente de alcalde, Gloria Prada, e o concelleiro de Deportes, José Manuel Mougán.
Alejandro Losada e Carlos Rey proclamárose campións de Europa na modalidade de parellas (medalla de ouro); Laura Álvarez, subcampioa de Europa en categoría individual e parellas (dúas medallas de prata); e Daniel Arean, subcampión de Europa por parellas (medalla de prata).
Ademais do logrado no europeo, o Club Tekwondo Neka, e os seus deportistas, conseguiron uns magníficos resultados deportivos en varios campionatos, motivo polo cal o alcalde lles entregaba unha placa conmemorativa. No Campionato de España de Taekwondo por Clubs, celebrado en Benidorm entre o 4 e o 7 de decembro, o Club Taekwondo Neka quedou subcampión de España, acandado 2 medallas de ouro, 4 de prata e 2 de bronce. Ademais, no Campionato de España Infantil por Seleccións Territoriais, celebrado en Benidorm entre o 4 e o 7 de decembro, foron 2 medallas de bronce e 1 de ouro as conseguidas polos deportistas do Neka. Na Copa Xunta de Galicia, celebrada o 11 de decembro en Bueu (Pontevedra), foron un total de 12 medallas, 4 de ouro, 3 de prata e 5 de bronce; e finalmente no Open Vila de Madrid, celebrado o 18 de decembro, foron 11 medallas, 5 de ouro, 3 de prata e 3 de bronce.
