Tres equipos, tres categorías e un fin solidario. O vindeiro xoves 4 de xaneiro a partir das 19 horas, os tres equipos sénior de fútbol de Valdeorras enfrontaranse nun triangular benéfico.
CD Barco (Preferente Galicia), CD Rúa (Primeira Galicia) e CD Córgomo (Segunda Galicia), saltarán ao terreo de xogo no campo municipal de Calabagueiros, no Barco de Valdeorras, para facer pasar un bo rato á afección e recadar alimentos que serán destinados a Cáritas Barco.
O triangular era presentado na mañá deste venres 29 de decembro por parte dos representantes dos tres clubs, Nilo, Pablo e Javier, e do presidente de Cáritas e párroco do Barco, Jesús Álvarez. Todo convidan á poboación a participar neste evento deportivo e solidario co que se fortalecerán os lazos dos clubs ao tempo que se colabora cos máis necesitados. “A entrada será de balde pero con alimentos non perecedoiros”, puntualizaba o presidente do CD Barco, Nilo Ramos.
Pola súa banda, o párroco fixo un guiño á posibilidade de continuar cos triangulares no futuro. “Sobre todo porque Cáritas está empezando o seu labor na Rúa e sería unha bonita forma de colaborar”, dixo, animando aos clubs.
Fotos e vídeos: Mónica G. Bellver.
