No marco da conmemoración do Día Mundial do Turismo, o 27 de setembro tiña lugar unha actividade divulgativa na Ribeira Sacra coa intención de poñer en valor os seus recursos paisaxísticos, ornitolóxicos e enogastronómicos. Deste xeito, Galicia únese aos obxectivos da Organización Mundial do Turismo (OMT) para fomentar a concienciación respecto da contribución real e o potencial do turismo ao desenvolvemento sustentable, tal e como se indica dende a Xunta.
Para seguir dando a coñecer o potencial paisaxístico e ornitolóxico da Ribeira Sacra, a Consellería de Cultura e Turismo programou, en colaboración co Consorcio de Turismo Ribeira Sacra, un itinerario por diversos miradoiros, co emprego da app Galicia Birding para o avistamento de aves e unha actividade de xeocaching.
A iniciativa contou coa participación da directora de Turismo de Galicia, Nava Castro, así como coa da alcaldesa de Parada de Sil, Yolanda Jácome, e do alcalde de Sober, Luis Fernández. Ademais esta proposta permitiu coñecer o potencial enogastronómico da zona degustando diferentes produtos típicos da Ribeira Sacra.
