Un total de 115 traballadores da Xerencia de Xestión Integrada de Ourense, Verín e O Barco de Valdeorras recibiron hoxe, 24 de febreiro, unha sentida homenaxe tras a súa xubilación no pasado ano 2017. O acto celebrouse no Teatro Principal de Ourense.
Deste total de xubilados no Sergas, o grupo máis numeroso procede do CHUO, 80, mentres que 9 son do Barco de Valdeorras e 3 de Verín. Por último, 25 traballadores homenaxeados prestaron os seus servizos de Atención Primaria.
No acto participou a delegada da Xunta en Ourense, Marisol Díaz, e o xerente de Xestión Integrada de Ourense, Dionisio López, e outros representantes do equipo directivo, xunto a estes traballadores homenaxeados e os seus familiares.
A delegada da Xunta salientou a “dedicación” destes traballadores e destacou a “importancia de honrar o labor dos diferentes colectivos que constitúen”. Asemade, falou da sanidade galega: “Temos unha sanidade que investiga, que forma magníficos profesionais, que prevén enfermidades, promove a saúde e ofrece unha atención primaria e hospitalaria de calidade”.