Como unha obra especialmente indicada para aqueles afeccionados a fotografía que desenvolven a súa actividade ao aire libre, e para os apaixoados da meteoroloxía que desexan mellorar a súa técnica fotográfica. Así se amosa “Fotograficar con mal tiempo” o libro de Eduardo Blanco Mendizabal, un dos máis recoñecidos fotógrafos de natureza de España (ten traballado esta temática durante varios anos visitando lugares como o deserto do Sahara, a selva da Amazonía, o macizo dos Alpes ou o círculo polar ártico), que será presentado este xoves, 17 de novembro, en Ourense, da man da Agrupación FotoSintese.
Nesta obra, que se dará a coñecer ás 20 horas no Centro Cultural Marcos Valcárcel, o autor analiza as diversas condicións da atmosféra e os fenómenos físicos que se dan na natureza (nubes, tormentas, neboeiros, eclipses, néboa, meteoros ópticos, auroras polares, volcáns, tremores de terra, etc.) e aporta consellos prácticos para sacarlles partido. Ademáis dos recursos técnicos e dos datos de realización das tomas, o libro inclúe unha variada galería de imaxes.
