Luns de cinema. O Cineclube Padre Feijóo prepara unha nova proxección para este luns, 2 de outubro. O título escollido é “A Bela Dormente” (2017). Esta película enmárcase dentro da programación da filmoteca galega do Centro Galego de Artes da Imaxe (CGAI).
Dirixida por Adolfo Arrieta, o filme ambientase no reino de Letonia, onde o novo príncipe Egon pasa as súas noites tocando a batería. De día, só unha idea rolda sobre a súa cabeza: internarse no reino de Kentz para atopar á Bela Dormente e romper o feitizo. Pero o seu pai, o rei, incrédulo das lendas, oponse totalmente. Será Maggie, arqueóloga da UNESCO, quen lle proporcionará a clave.
O filme proxectarase en dous pases, ás 20:30 e ás 23:00 horas, no salón de actos da Biblioteca Pública de Ourense. A entrada ten un custo de 2 euros para os asociados e 2,5 para o público xeral.