Non podía ser doutro xeito e ao ritmo de The Show Must Go On, coreado por centos de persoas, Doctor Queen pechaba na madrugada do 3 de agosto un multitudinario concerto no que o público vitoreou e cantou ata o último tema da mítica banda de Freddie Mercury.
Considerada como un dos mellores grupos tributo a Queen, a banda arxentina liderada polo cardiólogo Jorge Busetto prometía calidade e espectáculo no venres das Festas de Verán na Rúa, e non defraudou. Dende os míticos We Will Rock You, Sombody To Love, Another One Bites The Dust, I Want To Break Free ou Bohemian Rapsody ata outros menos coñecidos como Love Of My Live ou Killer Queen, ao longo de máis de dúas horas Busetto e a súa banda fixeron un completo percorrido pola extensa e incomparable carreira musical de Queen, interpretando asemade temas doutros grandes do rock como David Bowie.
Doctor Queen subíase ao escenario despois da actuación do grupo local Clon Bois que quentaba o ambiente coas súas potentes versións de clásicos do rock internacional de grupos como The Police, U2, Bruce Springsteen ou os mesmísimos Rolling Stones, entre outros moitos. O grupo nacía no ano 2015 e está formado por Suso da Rúa (batería), Ramiro do Barco (voz), Óscar de Chandoiro (baixo), David da Rúa (guitarra) e Félix de Trives (teclados).
A festa na Rúa continúa hoxe co triangular de fútbol veterano ás 18h. no Aguillón e a actuación da orquestra Claxxon en sesión de tarde e verbena.
Fotos: Mónica G. Bellver.