Trala paréntese do ano pasado por culpa da pandemia de coronavirus, as Xornadas Micolóxicas do Club Montaña Trives regresan este ano con máis ganas que nunca.
Así, A XXI edición arrancaba oficialmente na tarde do venres 29 de outubro, coa posta en marcha do VI Concurso da Tapa Micolóxica na que participan15 establecementos de hostalaría trivesa: Boliche, Manolos, Sky, Quintela, O Bodegón, A Cantina do Catro, O Pan da María, Casanova, O Pazo de San Lorenzo, As Maceiras, O Paíño, O Lar de Alicia, Estación de Montaña Manzaneda, San Martín e A Masía. Cada tapa ten un prezo único de 1,50 euros e será valorada por sabor e presentación polo xurado popular. O concurso concluirá mañá, 31 de outubro ás 15h. e ás 18h. farase un sorteo de agasallos entre o público participante na praza do Reloxo.
O programa continuaba a primeira hora deste sábado 30 de outubro cunha charla sobre micoloxía a cargo da asociación Os Cogordos, no Auditorio Julio Vázquez, e unha hora despois era o momento de saír ao monte para recoller cogomelos.
Xa de regreso, en torno ás 14:30h. servíase un xantar gourmet micolóxico no Restaurante La Viuda de Trives. E xa pola tarde procedíase á clasificación dos cogomelos recollidos, no patio da Casa Grande e, seguidamente, A Caniceira era a encargada de inaugurar a exposición cunha obra de teatro. Esta mostra tamén poderá visitarse ao longo da xornada de mañá, de 10 a 18 horas.