Na mañá do 10 de abril, Alejandro Rubín, director xerente de Expourense, asinaba un convenio de colaboración con Xosé González Pérez, presidente do Polígono Virtual de Galicia (P.G.V.), un clúster multisectorial que a través da organización de eventos profesionais comparte co recinto feiral o obxectivo de servir de agxente dinamizador da actividade empresarial en Galicia, prestando especial atención á provincia de Ourense.
Entre os puntos que contempla este convenio destaca o feito de que o P.V.G. poderá contar cun espazo reservado en tódalas feiras e eventos programados por Expourense para promocionar as distintas accións que están promovendo, así como presentar os servizos que ofrecen as empresas que decidan integrarse nesta entidade e que inclúen desde asesoramento das áreas de marketing, imaxe corporativa, internacionalización, competitividade, formación e novas tecnoloxías ata asesoramento fiscal, xurídico e económico.
Pola súa parte, o Polígono Virtual de Galicia promoverá entre os seus adheridos/usuarios os eventos organizados por Expourense, animándoos a participar de forma activa, ben como expositores, ben como visitantes profesionais ou asistentes ás xornadas técnicas.
