Xa están en marcha as obras da primeira fase de renovación do Centro de Saúde de Castro Caldelas, tanto do PAC como da zona de Atención Primaria, que ascenden a máis de 200.000€ euros. “Trátase dunha obra máis que necesaria para dar solución ás deficiencias que vén arrastrando dende hai moitos anos”, asegura a alcaldesa Sara Inés Vega, puntualizando que o Concello aporta 50.000 euros de fondos propios e o resto pono a Conselleira de Sanidade, para acometer a renovación completa do tellado e baixantes de todo o centro.
“Tamén reformaremos toda a entrada, aumentando a zona cuberta exterior, obras de accesibilidade nas duas entradas, obra completa da zona exterior entre o PAC e Atención Primaria, novas beirarrúas e beiravías ao longo de todo o exterior do Centro e todas as carpinterías metálicas das zonas de paso en todo o edificio”, engade a rexedora, recoñecendo que “é de xustiza o arranxo deste centro e tamén é o resultado dunha obra largamente pelexada, unha reivindicación histórica”, asegura.
Tal como expica Sara Inés Vega, Castro Caldelas dá atención sanitaria a 5 concellos no seu Punto de Atención Continuada dende as 3 da tarde ás 8 da mañá, así como consultas aos veciños e desprazados de 8 da mañá a 3 da tarde. “É un privilexio contar con estes servizos pero é igualmente certo que tanto os profesionais sanitarios como os pacientes deben contar con instalacións dignas onde non haxa fugas nin humidades e esta obra resolverá definitivamente estes problemas. Aínda quedan máis deficiencias por resolver pero, este é o comezo e non pararemos ata contar coas mellores instalacións”, conclúe.
Fotos: Concello de Castro Caldelas.
