A Asociación Xuvenil Amencer presentou esta mañá un concerto benéfico a cargo da Coral de Ruada que se celebrará o vindeiro día 22 ás 20.30 horas, no salón de actos do Colexio Os Salesianos. A presentación tivo lugar ás 12.00 horas na Aula Magna do colectivo ourensán e foi realizada polo presidente honorífico xunto co actual representante do grupo coral, Eladio Quevedo e Samuel Lago, respectivamente, e pola representante de Amencer, Laura Rodríguez.
A recadación será destinada íntegramente ao Campamento Urbano da cidade de Ourense, que organiza a propia asociación Amencer. As entradas pódense adquirir a través do colectivo organizador do evento ou na taquilla o mesmo día do concerto. Os interesados na colaboración, poden mercar a entrada de fila cero, que terá un prezo de tres euros.
