Con estritas medidas de seguridade sanitaria fronte ao Covid, desenvolvíase na tarde deste 26 de decembro un “Concerto de Nadal” moi especial no pavillón polideportivo de Manzaneda. Nel actuaban alumnos e profesores das escolas de baile tradicional, de pandeireta, gaita e acordeón, coas que colabora o Concello de Manzaneda.
O aforo do concerto estaba moi limitado, para evitar calquera tipo de aglomeracións e respectar as distancias de seguridade, “por iso apenas se lle deu difusión a actuación”, explican dende o Concello de Manzaneda. Tan só asistían familiares directos dos nenos e maiores que actuaban. A intención do Concello é poder organizar outro concerto deste tipo de cara a primavera e, ao aire libre, para que poida asistir máis xente, pero sempre mantendo as medidas sanitarias para evitar contaxios.
Este concerto era a única actuación prevista no programa de Nadal de Manzaneda, no que se limitaban os actos públicos como medida preventiva para evitar contaxios.
Fotos e vídeos cedidos.
