Todo a punto para que Quiroga celebre este domingo, 14 de maio, no lugar das Farrapas en Bendilló, a XXIII Mostra do Aceite. O programa desta Festa de Interese Turístico de Galicia iniciarase ás once e media da mañá coa posta en marcha do muíño e a apertura dos postos de venda de aceite e produtos típicos.
Para facilitar que as numerosas persoas que cada ano se achegan ata esta zona poidan ver o proceso de elaboración tradicional do aceite, dado o número reducido de aforo do propio muíño, na capela das Farrapas proxectarase un vídeo no que se pode ver como é este proceso.
Nesta xornada non faltará a música e o baile tradicional que virán da man dos grupos locais O Recanto, San Martiño e Arume da Queiruga.
En canto aos olivicultores participantes nesta edición, aos que se lles esixía contar con rexistro sanitario e con máis de 200 litros de aceite, son cinco. Trátase de Ouro de Quiroga, Jesús Bao Mondelo, Jesús Arias Rodríguez, Aceiroga e Pedro Soto Losada. No recinto feiral poñerán á venda o Aceite de Oliva Virxe Extra de Quiroga, que xunto coa recreación da elaboración tradicional no muíño serán os puntos centrais desta xuntanza.
