Pola zona antiga da vila pasará o trazado do Correlingua 2018 en Trives. Esta singular “carreira a prol da lingua” e non competitiva, coa que se abrirá o programa de actividades das Letras Galegas neste municipio, comezará ás 11:30h dende a praza do Reloxo.
“Esta é unha proposta de carácter lúdico-educativo que pretende convidar a toda a mocidade e aos centros de ensino a participar nun acto público de reivindicación do dereito a medrar en galego e tamén a exercer de maneira efectiva como galegos e galegas a través do uso do noso idioma. Un xeito de intervir no mantemento e difusión do mesmo coa participación activa da mocidade”, segundo sinala o Concello de A Pobra de Trives.
Nesta edición o lema do Correlingua será “A lingua non para!”. Ademais durante o desenvolvemento da carreira instalarase un “photocall” con frases en galego onde todos os asistentes poderán fotografarse coas súas frases e palabras preferidas en galego.
