Os arredor de 950 veciños do municipio ourensán de Sarreaus están convocados pola Área Sanitaria de Ourense, Verín e o Barco de Valdeorras para participar nun cribado de coronavirus que se desenvolverá mañá martes e que dará comezo ás 10 da mañá no polideportivo municipal da vila.
“Este peneirado, ao que se convocou á case que a totalidade dos veciños do concello, excepto ás persoas que xa fixeron a proba nos últimos días por indicación clínica,realizarase mediante a recollida de mostras para PCR o que permitirá coñecer o grao detransmisión comunitaria, así como detectar posibles positivos a Covid-19 asintomáticos – ou sen síntomas- cortando así a cadea de contaxios”, segundo informa o Sergas.
Nestes momentos o municipio rexistra 19 casos activos, polo que Sanidade considera necesario a realización deste cribado preventivo. “Esta iniciativa non se pode confundir coas probas que se realizanaos contactos directos dos positivos a Covid-19. Neste caso, trátase de facer probas a persoas sas e sen síntomas, precisamente para obter unha imaxe da evolución epidemiolóxica, nun tempo e espazo determinado”, aclaran dende a consellería.
Para poder poñer en marcha o operativo de mañá martes 8 de decembro (é a terceira vezque se realiza un cribado desta magnitude fóra da contorna hospitalaria) mobilizarase un equipo formado por dez profesionais sanitarios, enfermeiras e TCAEs, que realizarán durante aproximadamente oito horas a toma de mostras, o seu rexistro e o posterior traslado ao Servizo de Microbioloxía, onde se analizarán.
Os resultados coñeceranse os vindeiros días, notificándose os negativos vía SMS e os positivos directamente por parte do persoal médico de atención primaria. Para iso, a dirección da Área Sanitaria lembra novamente a importancia de manter os datos de contacto actualizados e comprobar que se está dado de alta no sistema de mensaxería telefónica do Sergas.