Saber como actuar ante unha situación de emerxencia pode ser vital. Por iso dende Cruz Vermella promoven a formación en primeiros auxilios para que todas as persoas saiban como responder ante estes casos.
A convocatoria para o curso deste ano é para os días 13, 20 e 27 de maio, e 3 e 10 de xuño en horario de 9 a 13 e de 15 a 19 horas na sede da Asemblea Comarcal Valdeorras (Casa do Río Cigüeño).
“Os Primeiros Auxilios son para todas as persoas, porque todas poden salvar vidas”, din dende Cruz Vermella, explicando que o curso terá unha duración de 40 horas lectivas e desenvolverase durante cinco sábados consecutivos para favorecer a conciliación laboral ou con outros estudos.
O temario inclúe o prendizaje da cadea de supervivencia, a reanimación cardiopulmonar básica en adultos, mobilidade e manexo urxente de vítimas, que facer ante a obstrución da vía aérea por un corpo estraño en adultos e nenos maiores de 1 ano, como tratar hemorraxias, queimaduras, traumatismos, picaduras e mordeduras de animais, que levar na caixa de primeiros auxilios…