ConcellosEn portadaÚltima hora

Desaparecen os rexistros da propiedade de Trives e de Viana do Bolo

O trivés intégrase no do Barco e o vianés no de Verín, segundo aparece publicado no BOE
Exterior dun dos rexistros da propiedade da provincia de Ourense./ Foto: A.R.

A primeiros de marzo o Ministerio de Xustiza publicaba no Boletín Oficial do Estado (BOE) o Real Decreto 195/2017, de 3 de marzo, polo cal se modifica a demarcación dos rexistros da propiedade, mercantís e bens inmobles. Nel aparecen unha serie de cambios que afectan á provincia de Ourense como é o caso da agrupación do rexistro da propiedade de O Barco-A Pobra de Trives e do de Verín-Viana do Bolo.

Na tarde do 9 de marzo o Concello da Pobra de Trives emitía unha nota de prensa na que rexeitaba os “criterios empregados para o cambio de demarcación, pois precisamente algúns deles, como o de non ter sido nunca desempeñado por rexistrador titular, inflúe decisiva e negativamente nos documentos presentados. Hai que recordar que o Rexistro de Trives estivo ocupado interinamente por rexistradores de rexistros tan distantes como Madrid ou Pontevedra. Estamos nunha demarcación territorial na que aínda existen innumerables parecelas por inmatricular e afastar o rexistro deste territorio contribuirá decisivamente a frear a inmatriculación de parcelas”.

No vindeiro pleno de Trives levarase unha proposta da alcaldía de rexeitamento do peche do rexistra, pois considérase que “este pode ser un primeiro de outras supresións de servizos como a praza de notaría ou o mesmo xulgado de primeira instancia e instrución”, segundo o Concello de Trives. O seu alcalde, Francisco José Fernández, considera que, “unha vez máis, empregáronse reiteradamente criterios demográficos para xustificar a supresión de servizos, centralizando os mesmos en zonas urbanas en prexuízo do rural”.

Segundo a citada normativa, no caso dos rexistros de O Barco-Trives procédese a agrupar os “distritos hipotecarios de ambos rexistros” e déixase como oficina principal a do Barco. Algo similar acontece co de Viana, que tamén se agrupa co de Verín “para ser desempeñados por un único rexistrador dando lugar ao rexistro da propiedade de Verín-Viana do Bolo” e deixando como oficina principal a do rexistro de Verín.

Ademais agrúpanse os rexistros de Allariz-Bande-Celanova, sendo a oficina de referencia que permanece a de Allariz; e os do Carballiño-Ridabavia con oficina no Carballiño. E no referente á veciña provincia de Lugo, tamén desaparece o rexistro de Quiroga, que se integra no de Monforte de Lemos.

Artigos relacionados

Back to top button