En portadaÚltima hora

Dez pacientes con coronavirus da residencia de maiores do Barco son trasladados ao Hospital de Piñor

Este centro funcionará como unha Unidade Residencial Medicalizada con 64 camas e un equipo asistencial multiprofesional da área sanitaria

Exterior da Residencia Nuestra Señora de Fátima do Barco.

 

O antigo hospital de Piñor (habilitado como área de expansión segundo o Plano de Continxencia da Área Sanitario de Ourense, Verín e O Barco de Valdeorras, en previsión da necesidade de mais camas, na actual emerxencia sanitaria) vén de abrir esta mesma tarde as súas portas para funcionará como Unidade Residencial Medicalizada, co obxectivo de atender axeitadamente aos usuarios positivos a Covid-19 de residencias da provincia sen capacidade asistencial.

Ao longo desta tarde, dez dos pacientes con diagnóstico positivo a Covid-19, da Residencia a Nosa Señora de Fátima de O Barco de Valdeorras, serán trasladados á nova unidade dotada con 64 camas e persoal propio da Área Sanitaria, nun equipo multiprofesional composto por celadores, técnicos de coidados auxiliares de enfermería (TCAE), persoal de enfermería, e persoal de medico.

A nova Unidade Residencial Medicalizada está plenamente integrada, como unha unidade máis do Hospital Universitario de Ourense. “Con esta iniciativa, preténdese dar unha resposta sanitaria axeitada ás actuais circunstancias desta emerxencia sanitaria,especialmente dedicada aos maiores institucionalizados, procedentes desta ou doutras residencias, públicas e privadas, da provincia”, segundo a Consellería de Sanidade.

Ademais a consellería indica que os coidados médicos dos novos residentes correrá a cargo dun equipo de especialistas de Medicina Familiar e Comunitaria voluntarios, procedentes de distintos Centros de Saúde e Puntos de Atención Continuada da provincia, de O Barco de Valdeorras, Ourense, Xinzo de Limia, Padrenda ou Verín.

Un dos pacientes trasladados á súa chegada a Piñor./ Foto cedida.

Traslado desde O Barco

Esta decisión xurde da intervención, no día de onte, da residencia de maiores Nuestra Señora de Fátima do Barco de Valdeorras, por parte da Xunta de Galicia, “coa intención de preservar a saúde de todos os seus residentes, o que, desde o ámbito sanitario-asistencial, foi seguida da valoración clínica individualizada de todos os casos positivos entre os residentes”.

Delo derivouse o seguimento, por parte dos profesionais do Servizo Galego de Saúde, “dos casos positivos clinicamente inestables, directamente na residencia, para en caso de ser preciso proceder ao seu seu traslado ao Hospital Público de Valdeorras. Mentres que os clinicamente estables valorouse o traslado ben a Residencia Integrada de Os Milagros, ou Piñor, optándose na tarde de hoxe por esta última opción ante a posibilidade de incluír tamén a pacientes dependentes ou con dificultades de mobilidade”.

Con esta nova unidade xa son dous os dispositivos de soporte dedicados específicamente na provincia aos maiores procedentes de residencias. O outro é a Residencia Integrada de Os Milagros (Baños de Molgas).

Artigos relacionados

Back to top button