Aínda que a apertura oficial será mañá coa lectura do pregón e o chupinazo, as Festas do Cristo 2022 do Barco de Valdeorras comezaban xa na tarde de onte coa Ludoteca Móbil da Deputación, deslucida pola chuvia; e continuaba hoxe con outra proposta para o público familiar.
Á beira do río Sil, no malecón barquense, desta volta cunha temperatura óptima e un brillante sol, a compañía de monicreques Títeres Cachirulo, presentaba o seu proxecto ‘A Compostela polas rutas xacobeas’, encadrado dentro do programa de promoción e dinamización O Teu Xacobeo.
Diante de numeroso público (cativos de diferentes idades acompañados por familiares), asistían a unha divertida representación da obra ‘Don Gaiferos e o Dragón’ que narra as aventuras do famoso personaxe ed dos seus compañeiros máis salientables do Camiño de Santiago.
O espectáculo inclúe un obradoiro para a construción dun monicreque e diferentes retablos sobre o xacobeo nos que retratarse.
Fotos e vídeo: Mónica G. Bellver.