Un total de 380 deportistas de once Comunidades Autónomas, entre os que estarán dous membros do Club Salvour de Ourense (Eva Feijoo e Roi Naranjo), participarán no XXXV campionato de España xuvenil, júnior e absoluto de inverno de salvamento e socorrismo deportivo que se disputará na piscina municipal Esperanza Lag de Elche (Alicante).
A júnior Eva Feijoo Gómez participará nas probas de 200 m. natación con obstáculos; de 100 m. socorrista; e de 100 m. combinada de salvamento. Tal como explican dende o club ourensán, esta deportista preséntase ao campionato “cunha das mellores marcas e con posibilidades de revalidar o título de campiona de España que obtivo o ano pasado”.
Tamén co obxectivo de meterse nas finais e acceder ás medallas competirá Roi Naranjo Estévez en 200 m. natación con obstáculos júnior.
