A través das acrobacias, o baile e o humor, a compañía Emotiva Producións conta a historia de Romeo, o seu protagonista, nun espectáculo que chega a Ourense, no transcurso dunha xira que o levará durante os próximos meses por toda a Península.
O Auditorio Municipal converterase así por unha tarde no escenario desta orixinal montaxe. O Circo das Estrelas ofrecerá unha única función, o domingo 14 de abril ás 18 horas. As entradas para a función, cun prezo de 18€, 23€, 30€, 35€ e 42€, pódense adquirir a través da web http://www.emotivaproducciones.com.
O Circo das Estrelas é unha orixinal mestura de teatro, circo e cabaret. As acrobacias aéreas, os cadros de baile, as escenas cómicas e outros elementos poéticos vertebran todo o espectáculo que está construído sobre un guion que fai de fío condutor.
O protagonista desta inesquecible historia chámase Romeo. Descendente de varias xeracións de renombrados artistas, ten o seu propio soño: quere converterse nun famoso showman internacional para non decepcionar aos seus antepasados. No seu camiño, está rodeado de persoas extraordinarias, que o axudarán a alcanzar a fama demostrando todo o seu talento e as súas habilidades artísticas. Pero a súa procura desesperada por conseguir o éxito, faralle esquecer valores como o amor e a amizade. Conseguirá a gloria, pero atoparase co corazón baleiro por non poder compartila con alguén que o ame.
Envolta nunha atmosfera máxica, ás veces surrealista, ás veces romántica, esta obra ofrece momentos de verdadeira poesía, sorprendentes xiros escénicos, incribles desafíos á lóxica e números cómicos hilarantes. Trátase dun dos espectáculos máis emocionantes, máxicos e poéticos dos últimos tempos.
