A I Xornada de Dano Neurolóxico “O ictus e a familia”, organizada polo Hospital da Cooperativa Santaria de Galicia -Hospital COSAGA e NeuroBurgas-, pechou onte con case 400 inscritos e coa conclusión final da necesidade de avanzar na abordaxe e coordinación integral e trandisciplinar desta patoloxía dende un punto de vista médico, social e familiar.
A xornada levouse a cabo no Salón Marie Curie do Campus de Ourense da UVigo. O encargado de abrila foi o xefe da EOXI de Ourense, Verín e O Barco de Valdeorras, Dionisio López Bellido, que destacou a importancia desa abordaxe “integral dun dano neurolóxico como é o ictus para que as secuelas sexan mínimas e a recuperación rápida e a mellor”.
O primeiro módulo da xornada, moderado polo director médico do Hospital Cosaga, Román Rodríguez, puxo o foco na diagnose e o tratamento do ictus. O primeiro en intervir foi Jesús Priego, do servizo de Medicina Intensiva do CHUO. O doutor Priego Sanz explicou o protocolo do coñecido como “Código Ictus” e enfatizou a importancia deste protocolo, “porque o tempo de reacción fronte ao ictus é fundamental para evitar secuelas, discapacidades severas e falecementos”, baixo a premisa “tempo é cerebro”.
O doutor Manuel Arce, especialista en radiodiagnóstico, explicou o importante da diagnose por imaxe “para primeiro confirmar o ictus e valorar a súa extensión”. Este experto analizou, tamén, as diferentes técnicas existentes -TAC e RM- para abordar a diagnose. O encargado de pechar o primeiro módulo foi o enfermeiro Rubén Armesto, da Unidade de Neurocirurxía do CHUO, que asegurou que desglosou o labor da enfermería nos casos de ictus “que han de estar sempre en alerta ante complicacións potenciais e saber informar a posteriori ao paciente e á familia do manexo de medicación e dos autocoidados”, dixo.
O segundo módulo da I Xornada de Dano Neurolóxico, “Abordaxe terapéutica e transdiciplinar do ictus”, estivo moderado por Fernando Villarino Rodríguez, codirector de Neuroburgas, e contou coa presenza do doutor Delfín Castro Campos, codirector de Neuroburgas e profesor da Universidade Pontificia de Salamanca; Serafín Ortigueira, profesor asociado da Universidade da Coruña; e Anxo Burrel Botaya, psiconeuroinmunólogo e fisioterapeuta, e profesor da Universidade Pontificia de Salamanca.
O doutor Castro Campos analizou as novas perspectivas da Unidade de Dano Cerebral na prevalencia do ictus en Ourense, e afirmou que esta patoloxía “ha de manternos en alerta constante e evolución permanente para lograr o obxectivo dunha abordaxe integral”. A Unidade, explicou, a primeira das súas características en Ourense, púxose en marcha este mesmo ano despois de que o Hospital Cosaga e Neuroburgas unisen forzas. Constituída por especialistas que prestan xa servizos dentro de Cosaga, e polo equipo de NeuroBurgas, especializado en rehabilitación neurolóxica, a unidade responde a unha demanda histórica na
cidade de Ourense, e confórmaa unha unidade hospitalaria; servizo de neuroloxía; neurocirurxía; medicina interna; fisioterapia neurolóxica; fisioterapia acuática; neuropsicoloxía ; terapia ocupacional; neurologopedia; integración sensorial; e todo o relacionado co diagnóstico por imaxe máis avanzado (RMN, TAC, ECO).
Sarafín Ortigueira e Anxo Burrel puxeron o acento na importancia de poñer en marcha un programa de exercicio terapéutico no paciente que sofre un ictus, e na estreita relación que ten a alimentación co dano neurolóxico, unha circunstancia que tamén destacou na apertura da xornada o xerente da EOXI Ourense-Verín-Valdeorras, o doutor Dionisio López Bellido.
O terceiro e último módulo centrouse na intervención social e familiar no ictus. Moderada por Sandra Quintana Caseiro, a secretaria da Fundación Neuroburgas, contou coa presenza de futuros profesionais do CIFP da Carballeira, quen trasladou ao público asistente a importancia do traballo do auxiliar de enfermería coas persoas dependentes, así como o manexo de cargas e os coidados do fogar para facer fronte á nova situación.
O impacto familiar
A mesa deste terceiro módulo contou tamén con Zeltia Veiga Roca, neuropsicóloga e terapeuta familiar na Fundación Neuroburgas, que abordou un dos temas máis complexos da xornada como é a resposta da familia e o impacto na mesma do ictus. Veiga Roca ofreceu algunhas claves para afrontar esta situación e situar á familia como auténtico motor terapéutico. O doutor Rubén González Rodríguez, profesor da Universidade de Vigo especialista en traballo social e servizos sociais, pechou as intervencións desta última mesa enmarcando o traballo social no sistema para a autonomía e a atención á dependencia.
Tanto o Hospital Cosaga como Neuroburgas puxeron en marcha estas xornada con vocación de continuidade, e co obxectivo de achegar a persoal sanitario e non sanitario a importancia dun traballo coordinado e transversal no tratamento do dano neurolóxico.