Na mañá deste sábado 26 de agosto falecía un home na localidade ourensá de Ramirás tras sufrir un accidente co seu vehículo, tal como informan dende o 112 Galicia, indicando que “foi necesario empregar os equipos de excarceración para liberar a vítima, que estaba atrapada no interior do coche”.
Aínda non eran as sete desta mañá, cando o 112 Galicia recibía unha alerta a través do sistema ecall do vehículo. “Enviaba datos dun sinistro na OU-531, ao paso por Ramirás, concretamente na parroquia de Paizás”, din dende o Centro Integrado de Atención ás Emerxencias de Galicia, que “co fin de comprobar esta información in situ”, pedían a colaboración dos membros do GES de Terras de Celanova, que “non só confirmaron o accidente, senón que tamén advertiron dunha persoa inconsciente atrapada no interior: era necesario proceder á súa excarceración”, explican dende o 112, engadindo que “pouco despois informaron de que a persoa, un varón novo, carecía de pulso e os profesionais de Urxencias Sanitarias de Galicia-061 nada puideron facer por salvarlle a vida”.
Ademais de efectivos de emerxencias e sanitarios, desde o 112 Galicia solicitaban a intervención dos axentes da Garda Civil de Tráfico. Igualmente, contaron co apoio dos voluntarios de Protección Civil e coa axuda do persoal de limpeza e mantemento da Axencia Galega de Infraestructuras.