Na mañá deste venres 24 de outubro unha muller resultaba ferida en Celanova despois de envorcar co seu coche na estrada OU-404, entre os puntos quilométricos 1 e 2, ao seu paso por Vilanova dos Infantes.
Segundo indican dende o 112 Galicia, era un particular quen, arredor das 09:00 horas, alertou “ao atopar o vehículo envorcado cunha persoa no interior que non podía saír polos seus propios medios”.
Desde o Centro Integrado de Atención ás Emerxencias 112 Galicia mobilizaron aos Bombeiros de Celanova, “que tiveron que acceder polo maleteiro para liberar á única ocupante do turismo”. Ademais, “solicitouse a intervención do Servizo de Urxencias Sanitarias de Galicia-061, da Garda Civil de Tráfico e do persoal de Protección Civil da localidade”.
A muller, unha vez liberada, “foi trasladada polo persoal sanitario ao centro hospitalario de referencia a bordo dunha ambulancia”, explican dende o 112.