Na tarde do mércores unha das persoas resultaba ferida ao envorcar o vehículo no que viaxaba en Barbadás, tendo que ser trasladada, en principio sen revestir gravidade, polo persoal de Urxencias Sanitarias de Galicia-061.
Tan como informan dende o 112 Galicia, sobre as 20:40 horas recibían a chamada dun particular que explicaba que foran alcanzados por un vehículo. “Trala colisión, este último quedara envorcado contra a barreira de seguridade metálica, á altura do quilómetro 2 da OU-540, en Barbadás, explicou, engadindo ademais que o coche envorcado estaba nas proximidades dun barranco”, din dende o 112. Naquel intre, estaban a intentar retirar aos ocupantes polo maleteiro. Outro particular implicado explicaba que o accidente se producira por un xabaril que se cruzou na vía.
Desde o 112, informaron aos servizos sanitarios, aos Bombeiros do Polígono de San Cibrao das Viñas, ao GES do Pereiro de Aguiar, aos axentes da Garda Civil de Tráfico, á Policía Local de Barbadás, e aos membros do Servizo Municipal e a Agrupación Municipal de Protección Civil de Barbadás, así coma aos servizos de mantemento das estradas.
Unha vez no lugar do accidente, “a Policía Local comprobou que o coche envorcado non corría risco de precipitarse polo barranco e que os implicados estaban xa no exterior do vehículo”, din dende o 112 Galicia. Desde Protección Civil engadiron que “as persoas foron quen de saír a través do maleteiro, polos seus propios medios”. Unha delas tivo que ser finalmente trasladada en ambulancia polo persoal de Urxencias Sanitarias de Galicia ao centro hospitalario de referencia.
