ALCER (Asociación para a Loita Contra as Enfermidades Renai) Ourense, organiza coa colaboración do Concello unha gala benéfica para este venres 21 de febreiro no Teatro Lauro Olmo, dirixida a toda a familia.
Os artistas que colaboran, de forma altruísta, son a Escola de Baile Abertal da Rúa, Anxo Rei, Nerea Jiménez, Guti González, o grupo de rock Seika e Fer “a contacontos”. Todo o evento estará amenizado e presentado por Cristina de la Torre e o acto de apertura e peche realizaranse a cargo dun representante do Concello e do Presidente da asociación, respectivamente.
Tal como avanzan dende a asociación, o teatro abrirá as portas ás 18:30 e o acto empezará ás 19 horas cando os asistentes poderán gozar dun espectáculo no que a prevención da enfermidade renal e a doazón de órganos tamén estarán presentes, xa que “dar visibilidade a esta patoloxía é o reto que nos marcamos para os próximos anos, para evitar diagnósticos tardíos; só o 10 % da poboación coñece o seu diagnóstico, polo que se poderían atrasar ou mesmo evitar fallos renais cun diagnóstico precoz”.
A asociación dispoñerá dunha mesa informativa e merchandising na entrada da gala. As entradas, que teñen un custo de 5 € en anticipada e 6 € en despacho de billetes, pódense adquirir nos negocios colaboradores: Escola de baile Abertal, Alba Dobao, Alquidobao, Chuches Ale, librería Caprichos e Ou Muro do Malecón.
“A enfermidade renal causa un gran impacto na vida da persoa que é diagnosticada, truncando o proxecto de vida e ocasionando na maioría dos casos a imposibilidade de compaxinar o tratamento cunha vida laboral, dada a cantidade de horas que a persoa dedica ao tratamento. Polo que é necesario un diagnóstico precoz, acompañar con información fiable, recursos adecuados e apoio cando chega o diagnóstico, pero sobre todo, é importante cambiar o infradiagnóstico desta doenza e previr para non chegar a necesitar un tratamento sustitutivo”, explican dende ALCER Ourense que leva traballando para as persoas con enfermidade renal crónica e familiares desde o ano 1982, ofertando actualmente servizos de información, apoio, visitas a pacientes en diálises, axudas económicas para as persoas con menos recursos, nutrición, exercicio físico, psicoloxía, sexología, e moito máis.
Cos fondos recadados busca manter estes programas, así como ampliar a súa actividade, que xa se viu aumentada nas comarcas de Valdeorras e de Monterrey nos últimos anos.
