A compañía valdeorresa Gargalla Teatro segue colleitando galardóns coa súa montaxe “Un desastre de función”. Esta fin de semana sumaba outros tres recoñecementos, desta volta na gala do XVII Festival de teatro afeccionado “Viaje al Parnaso” de Argamasilla de Alba (Ciudad Real). En concreto esta obra facíase co premio do xurado, co premio do público e o premio ao mellor actor, para o valdeorrés Paco Campos.
Esta comedia está dirixida por César Martínez “Goldi” e Manuel Caramés, e interpretada por un elenco formado por Reyes Limia, Aurora Fernández, Carmen Hernández, Álvaro Baños, Manuel González, Manuel Caramés e Paco Campos.
“Un desastre de función” poderá verse de novo no escenario do Teatro Lauro Olmo do Barco o vindeiro venres 24 deste mes. Xa en marzo, teñen previsto actuar na cidade de Ourense.
