Lixeiro descenso de positivos nas cifras de Covid-19 na Área Sanitaria de Ourense, Verín e O Barco. Rexístranse un total de 595, o que supón 5 menos que onte, segundo os últimos datos publicados esta mañá pola Consellería de Sanidade e actualizados ás 18h. do 1 de xaneiro. Deste xeito nesta xornada deténse a subida que se viña notando nos tres días anteriores.
Dese total de positivos, 22 están hospitalizados en planta (1 máis que onte) e 2 na Unidade de Coidados Intensivos (os mesmos que onte). Ademais baixan os novos casos confirmados por PCR nas últimas 24 horas un total de 14 (fronte aos 52 de onte).
No que se refire aos ingresos, o Hospital Público de Valdeorras continúa con 1 hospitalizado en planta (o mesmo dato que na última semana), mentres o Hospital de Verín está libre de virus e o Hospital Universitario de Ourense rexistra 21 en planta (1 máis que onte) e 2 na Unidade de Coidados Intensivos (os mesmos que onte).
O total de casos rexistrados ata o de agora na provincia ascende a 8.653, con 7.748 curados e 309 falecidos (onte Sanidade non notificaba ningún falecemento). Polo de agora lévanse realizado 136.922 probas PCR e 67.926 probas serolóxicas.
