Diferentes texturas, sabores e elaboracións, pero harmonizadas cos godellos e mencías valdeorreses. Nos días 12 e 13 de xullo desenvolvíase no Barco a III Ruta dos Pinchos da Feira do Viño de Valdeorras. Nesta exitosa iniciativa participaban preto de 20 locais de hostalaría, cada un dos cales ofrecía orixinais e diferentes pinchos ao prezo de 1,70 euros.
As propostas ían dende as “cestiñas de cristal” da Cafetería Cristal, ás filloas recheas de delicias do mar do Café Bar San Roque e o Pincho Vinum (do local do mesmo nome) ata o capricho de bacallau do Restaurante Piquiño e as piruletas crocantes de polo á mostaza e mel do Divino Paseo.
Tamén estaba na ruta o Bar A Cova cunha “frincadela especial e croqueta holandesa”, A Maltería, o Restaurante Fernando III cos seus pementos recheos de bacallau con gulas nunha salsa de ameixas, a Tapería Al Natural con mexillóns picantes, o Restaurante Tomás cun cóctel do mar e montaña ao godello, a Taberna O Buraco con xarrete ao viño tinto e Casa Ignacio cun niño de paspallás, tosta con carpaccio de bacallau, folla de primavera e saquiños de bacallau.
A oferta desta ruta completábase co follado recheo de paté de mexillón do Restaurante La Gran Tortuga, coas carrilleiras ao mencía de Il Piacere Gastrobar, co pincho de Casa Lameiro e coa “barrica” de La Querida.
Numerosas persoas degustaban esta ampla e variada oferta de pincho ao longo dos dous días da ruta, que nesta fin de semana do 14 e 15 de xullo dá paso á celebración da XXI Feira do Viño de Valdeorras. Esta iniciativa gastronómica ten sido organizada pola Asociación Empresarial de Valdeorras (AEVA), O Barco Centro Comercial Aberto (CCA) e o Consello Regulador da Denominación de Orixe Valdeorras.
Fotos: Carlos G. Hervella.