Mañá, venres 9 de agosto inaugurarase a XIV Feira do Viño de Monterrei, aínda que se prolongará sábado e domingo. Así, esta inauguración terá lugar na Alameda de Verín ás 20:00 horas, coa apertura do recinto feiral, a actuación da Banda de Gaitas de Verín, a lectura do pregón a cargo do actor Rubén Riós, e a intervención das autoridades. Ás 23:00 horas pecharase o recinto, para que ás 00:00 horas teña lugar a actuación de “El Consorcio” na Prada de García Barbón.
O sábado, a apertura dos stands será de 11:30 a 14:00 horas e de 20:00 a 01:00 horas. As actuacións na Praza de García Barbón terán lugar ás 23:30 horas, a cargo de “Remember Queen”, e á 01:30 horas, o grupo “En Mala Hora”. O domingo, o horario de apertura dos stands pola mañá será o mesmo que o sábado, pero pola tarde pechará ás 23:30 horas; mentres que “Leilía”, será o grupo que peche esta edición da Feira do Viño, ás 21:30 horas na Praza de García Barbón.