Contra as dez da noite do mércores 19 de abril producíase un incendio nun inmoble situado na rúa Caleras do Barco, segundo informaba o 112 Galicia. O suceso sorprendía aos veciños da zona, algúns dos cales baixaban a rúa e seguían con preocupación a evolución dos labores de extinción.
Segundo indican dende o 112 o incendio tiña lugar nun garaxe e botou a perder un vehículo e outras pertenzas. “Non houbo persoas feridas, aínda que o dono do vehículo si inhalou fume cando trataba de retirar o coche e poñelo salvo. Con todo, e malia a insistencia, rexeitou a asistencia médica”, aseguran.
Da extinción do lume, ocupáronse os Bombeiros de Valdeorras e os membros do GES. Tamén contaron coa colaboración dos axentes da Garda Civil e con voluntarios de Protección Civil do Barco, da Rúa e de Vilamartín de Valdeorras.
