Con anos de experiencia no fútbol ourensán, especialmente no Ponte Ourense en todas as categorías, e tralo paso por equipos da provincia de Pontevedra como o Cultural Areas ou o Alondras CF que dirixiu a pasada tempada e parte desta, José Antonio Rodríguez chega ao Centro de Deportes Barco para asumir o cargo de director deportivo e xunto ao adestrador ourensán Cándido Gómez, reconducir ao primeiro equipo, cara a salvación.
Segundo a túa experiencia na Terceira RFEF, como ves o nivel da categoría este ano?
O nivel é moi parexo e os partidos resólvense por pequenos detalles. É moi difícil sumar de tres e ao final é moi importante manexar ben as situacións e pulir os detalles porque é aí onde onde está a clave.
Dicía o presidente que a situación do CD Barco non é límite pero si complicada, con que obxectivos vos facedes cargo do equipo?
O obxectivo non é outro que intentar sumar o maior número de puntos posibles porque sabemos que a situación é de máxima igualdade e complicada e quedan poucas xornadas, co cal hai que tratar de revertila lo antes posible.
Asumes o cargo de director deportivo.
Efectivamente e como tal intentarei axudar en todo o que poida ao adestrador, Cándido, aportando o meu gran de area ao club. O primeiro será asesorar na área deportiva, orientando ao míster e entre todos buscar a mellor solución para sacar o proxecto adiante. O importante para min é sumar apoidando ao máximo ao equipo e ao corpo técnico co que imos traballar.
O primeiro reto é o domingo ante o Atlético Arteixo. Como ides plantexar o partido?
Xogamos en casa e somos un equipo que malia a situación na clasificación temos as nosas fortalezas e ao final o plantexamento será para facernos cos tres puntos. Sabemos que o escenario cambia totalmente cunha vitoria e iso é o que temos que buscar.
