Continúa a xira internacional do proxecto “A Rosalía. Dúo de piano e voz emocionada”. Trátase dunha singular proposta da actriz Lucía Álvarez, natural de Mouruás (San Xoán de Río), e da pianista Rosa Torres-Pardo que xungue poesía, voz e música ao mesmo tempo que afonda na vinculación entre a poeta Rosalía de Castro e o escritor granadino Federico García Lorca.
Na tarde do pasado 2 de marzo este espectáculo presentábase en Lisboa (Portugal) no Palácio Nacional da Ajuda. Nel engárzanse os versos de Rosalía de Castro e os dos poemas galegos de Federico García Lorca cunha escolma de composicións musicais de autores como Granados, Antonio Soler, Schubert ou Chopin, entre outros.
Este traballo pasaba anteriormente por outros escenarios internacionais como os de Cracovia e Varsovia (Polonia).
Fotos cedidas.
