Máis de 1,6 millóns de euros para un boleto da “Primitiva” selado no bar Pingallo de Viana

No sorteo da Primitiva celebrado na noite do xoves 6 de outubro non houbo boletos acertantes de Categoría Especial (6 acertos + reintegro), pero si houbo un único acertante de Primeira Categoría (6 acertos) que foi validado no Despacho Receptor número 55.950 de Viana do Bolo, no bar Pingallo, ubicado no número 12 da rúa Mazairas. Como único acertante desta categoría o seu propietario percibirá 1.606.197,34 euros.

A combinación gañadora estivo formada polos números 3, 19, 23, 26, 30 e 41. O complementario, o 13 e o reintegro, o 4. O número do Joker foi o 6199432. A recadación do sorteo ascendeu a 13.190.963 euros.