Tras dez intensos días de cine, o domingo finalizaba o 26 OUFF (Ourense Film Festival). E neste luns a organización facía balance do que ten suposto esta edición. O presidente da Deputación de Ourense, Manuel Baltar, xunto co director do festival, Miguel Anxo Fernández, e a presidenta da Fundación Carlos Velo, Carmen Leyte, comparecían ante os medios para valorar o festival.
Nada mellor que os números para dar unha idea real do que sucedeu nestes días. O OUFF contaba nesta 26 edición cunha programación composta por 93 proxeccións, 71 películas e 24 países participantes. Conseguiuse executar o 100% do que estaba previsto. Un dos datos que máis cabe destacar é o do público; sen eles, o festival non tería sentido. A pesar das restricións aínda vixentes polo Covid-19, rexistrouse un gran número de espectadores que chegou a superar os da edición de 2018, previa a pandemia. Participaron no conxunto de actividades do festival nesta 26 edición, máis de 9.300 persoas, das que 6.150 foron espectadores que acudiron ás proxeccións celebradas no Teatro Principal, no Cineclube Padre Feijoo e nos Galicine. As entradas esgotáronse na maior parte das sesións e notouse un incremento de público mozo.
Ademais, o público implicouse como nunca e participaron nas votacións de Sección Oficial un 87,80% das persoas que asistiron ás proxeccións. E algo inda mellor, a súa valoración foi moi notoria. As películas da Sección Oficial conseguiron unha nota media de 3,8 sobre 5. Destaca aquí o sobresaínte de Mediterráneo, Premio do Público, cun indiscutible 4,64 sobre 5.
No apartado de comunicación, tanto a web do OUFF (cun incremento do tráfico web do 45% respecto ao ano anterior) como as redes sociais (con máis de 1200 publicacións e 15.000 interaccións nos últimos tres meses ademais dunha importante suba na cifra de seguidores) notaron o incremento do interese do público e serviron de vía de comunicación directa cos espectadores ourensáns e de toda Galicia.
“A valoración non pode ser máis positiva en tódolos aspectos. O programa cumpriuse na súa totalidade, o que pon en maiúsculas o traballo organizativo notabilísimo do equipo do festival. E non digo sobresaínte porque hai que deixar algo para a edición próxima” afirmou o presidente da Deputación. “Tódolos ollos do sector audiovisual estiveron en Ourense e todos miraron para aquí, xa non só durante os días do festival, senón con mirada de futuro. Especialmente coa promoción de Ourense como centro de negocio e tamén como plató de cine” comentaba Manuel Baltar.
Pola súa banda, Miguel Anxo Fernández destacaba que “a organización dun festival é cousa dun equipo. Nunca sobra repetilo. É raro e complicado que saia todo á perfección pero funcionou todo como un reloxo, o que me mete algo de medo para ver como superamos isto en 2022”. Tamén falaba de que “o impacto mediático foi extraordinario. Falouse moito do OUFF e chegamos a lugares onde nunca chegaramos antes, o que tamén é fundamental para cimentar a imaxe do OUFF como festival de Galicia”. Fernández finalizaba agradecendo a todos a súa colaboración, especialmente das institucións, equipo e medios, e “desexando ter no 2022 un grandísimo festival de cine”.
Finalmente, Carmen Leyte, sinalou que debemos “sentirnos orgullosos de que o festival se consolide ademais de que medre e se internacionalice. A Fundación está sempre en defensa do audiovisual e, en especial, deste Ourense Film Festival que temos que facer máis grande entre todos”.
Esta 26 edición do OUFF tamén destacou por converter a cidade nun lugar de encontro, debate e negocio para todo o sector audiovisual galego, o que pon de relevo o bo camiño para seguir sendo o festival de cine de toda Galicia. Moitas reunións se celebraron estes días, das que algunhas porán sobre a mesa proxectos audiovisuais que moi pronto coñeceremos relacionados coa provincia de Ourense.
Este ano tamén serviu para consolidar a implicación de todo o empresariado ourensán coa mostra festival. “O ámbito empresarial de tódolos sectores está a ver como o OUFF serve de plataforma de promoción para toda a cidade e para os seus negocios. Destacamos o agradecemento a Adolfo Domínguez, Perez Rumbao, Centro Comercial Aberto Ourense Centro, Asociación de Perruqueiros de Ourense, Centro Comercial Ponte Vella e os múltiples locais de hostalaría que usaron a imaxe do OUFF”, segundo a súa organización.
Hai que destacar que esta edición do OUFF estivo organizada pola Fundación Carlos Velo co apoio principal da Deputación e co dos copatrocinadores, entre eles a Xunta de Galicia e o Ministerio de Cultura y Deporte.
Ademais a organización adiantaba as datas do 27 OUFF: do 23 de setembro ao 2 de outubro de 2022.
