Máis de 900 persoas daranse cita mañá no xantar do Codillo, na Rúa

O pavillón deportivo da Rúa está xa preparado para a gran cita de mañá. A partires das dúas e media da tarde, abriranse as portas para acoller aos asistentes (prevense máis de 900) á XII edición da Festa do Codillo, a cita gastronómica de referencia na localidade organizada polo Concello.

Unhas horas antes terán lugar as homenaxes a Vicente Solarat Maceda e ao C.D. Rúa (que será tamén quen se encargue da barra do bar no pavillón) no Centro Cultural Avenida e tralo xantar, haberá sesión de baile a cargo do trío Expresión. Despois, o Concello ten tamén preparada unha tarde de cantos de taberna polos locais de hostalaría da vila a cargo de Abertal, Pándega e Airiños de Caldelas.