Medio Rural cederá unha motobomba ao Concello da Rúa “tan pronto haxa dispoñibilidade”

O director xeral de Defensa do Monte, Tomás Fernández-Couto, asegurou esta mañá do día 4 de xullo na Comisión 7ª do Parlamento que a Consellería do Medio Rural cederá unha motobomba ao Concello de A Rúa respondendo a unha pregunta da deputada ourensá do BNG, Noa Presas. Esta parlamentaria tamén lle preguntaba polas súas razóns para “discriminar este concello na distribución de medios para ese fin”.

Pola súa banda, o representante da Consellería indicou que todo o territorio galego está cuberto con medios humanos e materiais para combater os incendios forestais, pero que debido ao alto custo deste tipo de vehículos, trátase dun traballo gradual, en función da dispoñibilidade e da planificación do servizo de incendios.