O Auditorio Municipal de Ourense acolleu hoxe o III Encontro de Mulleres Ceradoras no marco do FITO (Festival Internacional de Teatro de Ourense). Unha actividade xa tradicional enmarcada dentro desta cita e que encárgase de analizar e reflexionar en torno á visibilidade das actividades artísticas das mulleres; interconectar ás diferentes creadoras dun novo panorama escénico xurdido en Galicia e “a solidariedade para acadar resultados concretos e efectivos de vez, afianzar e emprender procesos progresivos para alcanzar a igualdade entre homes e mulleres no ámbito cultural”.
Así, na mañá de hoxe, 13 de outubro, tivo lugar a primeira das mesas titulada “A Cultura e o Xénero. Políticas de Intervención”. Un encontro entre mulleres políticas de diferentes ámbitos da política como a presidenta da Deputación de Pontevedra, Carmela Silva; as deputadas pola provincia no parlamento de Galicia, Ánxeles Cuña (En Marea) e Noa Presas (BNG) e a deputada no Congreso dos Deputados de En Marea, Alexandra Fernández; e Laura Seara, do PSOE e a Plataforma Feminista Galega.
Na presentación, a moderadora e actriz Marta Pérez, expuxo con datos os argumentos que levaban a organizar este tipo de iniciativas, entre eles están as cifras: “A análise das cifras de participación das mulleres respecto aos homes no teatro a nivel estatal indican que só 1 de cada 4 papeis son para unha actriz, no cine e series de televisión só un 20% das personaxes son para mulleres, fronte un 80% para os homes. Na dirección artística e dramaturxia o 79% son homes fronte ao 21% de mulleres. En música e espazo sonoro tamén é importante a desproporción: un 87,5% os homes e un 12,5% as mulleres. Podemos dicir que existe pois, unha clara división do traballo en función de xénero, aparecendo oficios e profesións feminizadas e outras masculinizadas”.
Por este motivo, todas as mulleres políticas expuxeron o que fan, dende o seu ámbito, para dar presenza ás mulleres neste mundo. Por exemplo, Carmela Silva, presidenta da Deputación de Pontevedra, arrancou cun discurso no que enumerou a todas as mulleres que tiveron presenza na historia da cultura “e que son apartadas dos libros de texto”, dixo. A presidenta foi tallante ao asegurar que “hai unha forte desigualdade neste mundo” e reiterou que “temos mulleres que están a ser referentes a nivel europeo e mundial das que non sabemos o nome, e isto non pode ser”, sentenciou. Por este motivo, explicou, dende a administración que preside crearon un área de Igualdade “a primeira Deputación de Galicia que a ten”, aclarou, e enumerou as iniciativas entre as que está a creación dunha escola de igualdade baixo o no me de “Maria de liliane”, co que puxeron en marcha o proxecto “Cinema e Muller”, “co que fixermos un mapeo de todas as mulleres vencelladas o mundo do cinema na provincia”, dixo Silva, entre outras moitas.
Tras Carmela Silva foi a quenda da deputada Alexandra Fernández, que referenciou dúas iniciativas “unha que xa está aprobada e outra que será aprobada nas vindeiras semanas”. Entre esas está “a creación dun observatorio de igualdade no campo da Cultura dentro da Comisión de Igualdade”, a cal, dixo “temos que agardar a que o PP a asuma”. A outra iniciativa é a da aprobación dunha iniciativa de “transición profesional no audiovisual”. Esto quere dicir que, segundo explicou Fernández, que cando a xente chega a certa idade “non poden exercer o seu traballo como os actores, bailaríns ou acróbatas de circo” e esta iniciativa, dixo a deputada, “vailles axudar a atopar traballo tras ese retiro da súa actividade habitual”.
Tamén Noa Presas asegurou que as iniciativas políticas son esencias para garantir a igualdade no mundo da escena. Entre esas están a “potenciación dun teatro galego de calidade onde as institucións teñen que facer unha inversión económica estable” así como “a promoción e integración dos espectadores, facendo prezos populares para que a xente teña accesibilidade á cultura, e neste punto teñen moita implicación os concellos”, dixo.
Todas expuxeron o seu discurso e todas estiveron de acordo en que a muller ten que ter máis presenza dentro do mundo da cultura (música, teatro, cinema etc.) e todas chegaron á conclusión de que a muller ten que ter máis presenza nas institucións públicas e en altos cargos para poder levar a cabo políticas de igualdade na cultura.
Texto: Carlos Asensio.